Millioner Ilon Mask tarapyndan esaslandyrylan xAI kompaniýasy öz onlaýn ensiklopediýasyny açmaga taýýarlanýar. Ol "Grokipediýa" (Grokipedia) diýlip atlandyrylar diýip, telekeçi X sosial media platformasynda yglan etdi.
Maskyň bu sözleri Trampyň administrasiýasynyň emeli aň we kriptowalýuta boýunça ýörite wekili Dewid Saksyň ýazan postuna jogaby boldy. Saks “Wikipediýa” takyklanmadyk we esasly üýtgeşmeleri gadagan edýän "çepçi aktiwistleriň topary" tarapyndan gözegçilikde saklanýar diýip hasaplaýar.
"Mesele “Wikipediýanyň” köplenç Google gözleginiň netijelerinde ilkinji bolup peýda bolýanlygynda we indi onuň AI modelleri üçin öwreniş çeşmesi bolmagy bilen ýagdaý hasam kynlaşýar. Bu gaty uly mesele" – diýip, ol ýazdy.
Mask “Grokipediýanyň” döredilmeginiň "xAI-iň äleme düşünmek maksadyna barýan ýolunda zerur ädim" boljakdygyny aýtdy. Onuň sözlerine görä, täze çeşme "Wikipediýadan has gowy bolar".
Grok - bu xAI tarapyndan döredilen AI esasly döredijilik çat-botudyr. Mask ony 2023-nji ýylyň noýabr aýynda işe girizdi. Çat-bot X sosial ulgamyna birleşdirildi we ulanyjylar onuň jogaplaryny paýlaşyp bilerler.
“Wikipediýa” - meýletinçiler tarapyndan döredilen köp dilli, açyk mazmunly onlaýn ensiklopediýa. Ol 2001-nji ýylyň ýanwar aýyndan bäri işleýär we täjirçilik däl “Wikimedia gaznasy” tarapyndan dolandyrylýar.
“Wikipediýanyň” özi munuň iň uly we iň köp okalýan maglumat kitabydygyny, şeýle hem adamzadyň taryhynda döredilen iň giňişleýin ensiklopediýadygyny aýdýar. SimilarWeb-iň berýän habaryna görä, 2025-nji ýylyň maý aýynda bu sahypa dünýäde iň köp girilýänlikde sekizinji orny eýeledi.
