Polşaly alpinist Anjeý Bargel kislorod ballonyny ulanmazdan lyžada Ewereste çykan we düşen dünýäde ilkinji adam boldy. Bu barada The Guardian habar berýär.
“Depä çykmagyň özi kyn boldy. Men ozal hiç haçan şonça wagtlap şeýle belentlikde bolmandym. Kislorod bolmazdan Ewerestden lyžada düşmek meniň ençeme ýyl bäri arzuwymdy” – diýip, Bargel belledi.
Dagyň “ölüm zolagy” diýilýän ýerini – 8 müň metrden ýokary bölegini geçmek üçin Bargel tas 16 sagat sarp etdi. Ewerestiň depesinde howa şeýle bir az welin, alpinistler deňiz derejesinde elýeterli bolan kislorodyň diňe üçden birini alýar. Bu hem beýnä zyýan ýetmek, öýkende suwuklygyň üýşmek we hatda ölüm howpuny döredýär.
Ozal Bargel Ewerestden şeýle çemeleşme bilen düşmäge synanyşypdy, ýöne onuň 2019-njy we 2022-nji ýyllardaky synanyşygy şowsuz tamamlandy. Ol 2018-nji ýylda dünýäde beýikligi boýunça ikinji orunda durýan K2 pakistan dagyndan lyžada düşen ilkinji adam boldy.
Gimalaý baza maglumatlaryna görä, Ewereste 6 müňden gowrak adam çykdy, ýöne diňe, takmynan, 200-üsi muny kislorod ballony bolmazdan amala aşyrdy. Käbir alpinistler lyžada düşse-de, olaryň ýoly Bargeliňki ýaly uzak bolmandy.
