Ispaniýanyň San-Sebastýan şäherinde 73-nji halkara kinofestiwaly tamamlandy. Baş baýragy – “Altyn balykgulagy” ispaniýaly režissýor Alauda Ruis de Asuanyň “Ýekşenbe günleri” (Los domingos) dramasy aldy. Bu barada Deadline neşiri habar berýär.
Film monah bolmak kararyna gelen 17 ýaşly gyz barada gürrüň berýär.
Tomaşaçylaryň baýragyna režissýor Kauter Ben Haýnanyň “Hind Rajabyň sesi” (Голос Хинд Раджаб) dramasy mynasyp boldy. Ozal palestinaly gyzyň pajygaly ykbaly baradaky film Wenesiýa kinofestiwalynyň Gran-prisini alypdy.
Fransuz režissýory Žoakim Lafosse iki baýrak aldy – iň gowy režissýorlyk üçin “Kümüş balykgulagy” we “Şol baharyň alty güni” (Шесть дней той весной) filminiň ssenarisi üçin baýrak.
Şu ýyl kinofestiwalyň emin agzalarynyň başlygy “Mümkin däl”, “Gar jemgyýeti” we “Ýura eýýamynyň dünýäsi” filmleri bilen tanalýan režissýor Huan Antonio Baýona boldy.
Hormatly laureatlaryň arasynda karýerasynda gazananlary üçin “Donostiýa” baýragynyň iň ýaş eýesi bolan Jennifer Lourens bar. Festiwalda Lourensiň Robert Pattinson bilen bilelikde baş keşbi ýerine ýetirmeginde täze “Öl, söýgim” (Умри, моя любовь) psihologiki trilleri görkezildi.
San-Sebastýandaky kinofestiwal 1953-nji ýyldan bäri geçirilýär. Ol Ispaniýada iň uly medeni waka we dünýäde iň esasy festiwallaryň biridir. Dürli ýyllarda festiwalyň baş baýragyny Frensis Ford Koppola, Marlon Brando, Terrens Malik, Klod Şabrol, Nikita Mihalkow we Jeýms Franko dagy aldy.
