NASA 2026-njy ýylyň 5-nji fewralynda «Artemida» maksatnamasynyň çäginde ekipažly Aý uçuşyny amala aşyrmagy meýilleşdirýär. Eger bu senä çenli ýetişilmese, iň soňky sene hökmünde aprel aýy görkezilýär diýip, Reuters habar berýär.
«Artemida» — amerikan Aý gözleg maksatnamasy bolup, onuň maksady 1972-nji ýyldaky «Apollon-17» missiýasynyň üstünliklerini gaýtalamak we Ýeriň tebigy hemrasy bilen adamyň gatnaşygyny dikeltmekdir. Maksatnama üç tapgyrdan ybarat:
- Artemis I — pilotsyz Aý uçuşy (2022-nji ýylda üstünlikli ýerine ýetirildi),
- Artemis II — ekipažly Aý uçuşy,
- Artemis III — 2027-nji ýylyň ortalarynda Aýyň günorta polýusynda astronawtlaryň gonmagy.
Artemis I-iň çäginde «Orion» kosmos gämisi 2022-nji ýylyň awgustynda Aýa ugradyldy, onuň daşyndan aýlanyp, noýabrda Ýuwaş ummanynda gonupdy. Indi Artemis II synag tapgyrynyň wagty geldi.
NASA-nyň bellemegine görä, bu missiýanyň doly üstünlikli hasap edilmegi üçin Aýy aýlanyp çykmak, ekipažy sag-aman Ýere dolap getirmek we olaryň garşylanylmagy zerurdyr. «Orion» gämisi Aýyň orbitasyna girmez, diňe erkin aýlanyp çykyp, onuň üstüne 9260 km-den ýakynlaşmaz. Bu ätiýaçlyk çäreleri ekipažyň howpsuzlygyny üpjün etmek üçin görülýär, sebäbi Artemis II esasan synag uçuşydyr.
Artemis II we Artemis III uçuşlarynyň seneleri öň hem birnäçe gezek Orion gämisiniň ýaşaýyş üpjünçilik we ýylylyk goragy ulgamyndaky kemçilikler sebäpli yza süýşürilipdi.
