Google kompaniýasy Android-i şahsy kompýuterlere geçirmegiň üstünde işleýändigini tassyklady. Bu barada Snapdragon Summit-iň açylyşynda yglan edildi. Qualcomm-yň ýolbaşçysy Kriştianu Amon we Google-yň enjamlar we hyzmatlar boýunça uly wise-prezidenti Rik Osterlo bilelikdäki taslama barada gürrüň berdi.
Osterlo ozal PK we smartfonlar üçin dürli ulgamlaryň ulanylandygyny, ýöne häzir kompaniýalaryň bir umumy tehnologiki binýady döredýändigini belledi.
“Biz olary birleşdirmek boýunça taslamany işe girizdik. Bilelikde biz PK-da we stol kompýuterlerinde önümlerimiz üçin umumy tehnologiki binýady döredýäris. Bu EA-nyň üstündäki umumy işimizi, Gemini modelini, kömekçini, ähli programmalarymyzy we işläp düzüjiler jemgyýetini PK gurşawyna geçirmegiň ýene bir usulydyr. Meniň pikirimçe, Android üçin bu islendik enjamlar üçin ählumumy ulgama öwrülmäge mümkinçilik” – diýip, Osterlo aýtdy.
Geçen ýyl Google eýýäm Chrome OS bilen Android-i birleşdirmek meýilnamalary barada aýdypdy. Kompaniýanyň ýolbaşçylarynyň bu barada aç-açan we köpçülikleýin aýtmagy taslamanyň ösüşinde uly öňegidişligiň bardygyny aňladyp biler.
