Nissan 2027-nji ýylda kompaniýanyň önümçilik modellerinde peýda boljak ProPilot sürüjä kömek toplumynyň täze nesliniň işlenip taýýarlanýandygyny habar berdi. Ulgam kämilleşdirilen enjamlara we emeli aň bilen programma üpjünçiligine eýe bolar.
Programma üpjünçiliginiň üstünde Wayve kompaniýasy işleýär. Işläp düzüjiler EA-nyň kömegi bilen ulgamyň ulagyň töweregindäki ýagdaýlary seljerip, ýol hadysalaryny öňünden kesgitläp biljekdigini belleýär. Nissan täze ProPilot-y diňe bir häzirki däl, eýsem bolup biljek wakalara baha berýän tejribeli we ünsli sürüjiniň hereketleri bilen deňeşdirýär.
Ulgamyň enjam bölegi has kuwwatly bolar. Awtomobiliň üçeginde lidar oturdylar, goşmaça 11 kamera we 5 radar ulanylar. Şeýle toplum ProPilot-a ýollarda ünsi jemlemäge we dürli şertlere uýgunlaşmaga mümkinçilik berer.
Häzir täze ulgamyň prototipleri Tokionyň köçelerinde Nissan Ariya elektrokarlarynda synagdan geçirilýär. Ýöne kompaniýa haýsy funksiýalaryň awtomobilleriň önümçilik wersiýalarynda alyjylar üçin elýeterli boljakdygyny entek mälim etmedi.
