Kentiň uniwersitetiniň alymlary Britaniýanyň Dartmoor Tea çaý plantasiýasy, Lightcurve Films kompaniýasy we Europlanet bilen hyzmatdaşlykda çaýyň Aýyň topragynda ösdürilip ýetişdirilip bilinjekdigini anykladylar. Bu barada uniwersitetiň resmi saýty habar berýär.
Alymlar nahallary Aýyň we Marsyň topragyna meňzeşdirilen topraklara oturtdylar. Şertler kosmosa iň ýakyn ýagdaýda döredildi: temperatura, çyglylyk we ýagtylyk gözegçilikde saklandy. Aýyň topragynda çaý ýerli toprakdaky ýaly gowy kök urdy. Marsyň topragyna oturdylan ösümlikler bolsa ýaşap bilmediler.
«Biz kosmosy özleşdirmegiň täze eýýamyna gadam basýarys. Indi biz kosmosda ýaşaýyş we Aýda ýa-da Marsda bazalaryň döredilmegi barada pikir edýäris. Ilkinji soraglaryň biri: “Adamlar näme iýer?” Bu tejribeler ýer ýüzüniň ösümlikleriniň, meselem çaýyň, Aýyň topraklarynda, ýörite aý ýyladyşhanalarynda ösdürilip ýetişdirilip bilinjekdigini görkezýär. Bu bolsa şeýle bazalaryň ýaşaýjylaryna belli bir derejede özbaşdaklyk we täze azyga elýeterlilik berýär» diýip, gözlegiň awtorynyň biri professor Naýdjel Meýson belledi.
Alymlar gözlegiň heniz irki tapgyrlardadygyny, ýöne şonda-da Ýer ýüzünden daşarda hem britan çaý içmek däbiniň dowam etmegine umyt berýändigini bellediler.
Mundan başga-da, netijeler diňe geljekki kosmonawtlar üçin däl, eýsem ýer ýüzüniň biologlary we agronomlary üçin hem peýdalydyr. Olar oba hojalyk ekinleriniň kyn şertlerde we garyp topraklarda nähili ýaşap bilýändigini görkezýär. Bu bolsa global howanyň üýtgemegini we ýerleriň zaýalanmagyny göz öňünde tutanymyzda aýratyn ähmiýetlidir.
