Ilkinji eplenýän iPhone Apple-iň 2026-njy ýylda hödürlemegi meýilleşdirýän iPhone 18 hatarynda esasy smartfon bolar. Bu barada Bloomberg-iň žurnalisti Mark Gurman habar berdi.
Onuň maglumatlaryna görä, daşky görnüşi boýunça smartfon goşa iPhone Air-i ýada salar – inçe model ýaly ol hem titan korpusa eýe bolar we açylan görnüşde iň az ýogynlygy saklar. Häzirlikçe täze smartfonyň nähili atlandyryljakdygy belli däl.
Gurman taslamanyň üstünde işleriň dowam edýändigini belledi: kompaniýa üpjün edijileri we ýygnamak boýunça hyzmatdaşlary saýlaýar. Ozal önümçiligi Hindistana göçürmek mümkinçiligi ara alnyp maslahatlaşyldy, ýöne häzir gerek şaýlaryň bir bölegini Hytaýda çykarmak ýagdaýy öwrenilýär.
Bloomberg täze smartfonyň bahasynyň azyndan 2000 dollar bolup, Apple üçin rekord boljakdygyny habar berýär. Başga maglumatlar entek belli däl.
Şol bir wagtyň özünde, alyjylaryň ünsi eýýäm satuwa çykan täze iPhone 17, inçe iPhone 17 Air, şeýle-de iPhone 17 Pro we 17 Pro Max smartfonlaryna gönükdirilýär. Smartfonlar, hususan-da, ýokary modeller üçin isleg teklipden has ýokary boldy.
