OpenAI-iň gözlegçiler topary ulanyjylaryň ChatGPT-ä 1,5 mln ýüz tutmasyny seljerip, adamlaryň çat-bota ýüzlenmeginiň iň esasy sebäpleriniň sanawyny düzdi. Bu adamlaryň guraly hakykatda nähili ulanýandygyny görkezýän ilkinji uly barlag boldy diýip, The Independent habar berýär.
Görnüşi ýaly, çat-bot bilen söhbetleriň köpüsi amaly maslahatlar (28,3%), tekst ýazmak (28,1%) we maglumat gözlemek (21,3%) bilen baglanyşykly. Kän duş gelmeýän sebäpleriň arasynda tehniki görkezmeler (7,5%), multimedia gözlegi (6%) we özüňi görkezmek (döredijilik, şahsy pikirler, 4,3%) bar.
Şeýle-de, bilermenler ähli ýüz tutmalary üç esasy topara böldi: soraglar, herekete çagyryş (mysal üçin, “meýilnama düz”, “hat ýaz”) we duýgularyňy beýan etmek (mysal üçin, psihoterapewtik maslahatlary almak üçin). Ähli ýüz tutmalaryň ýarysyndan gowragy soraglaryň, 35% töweregi herekete çagyryşyň, 14%-i duýgularyňy beýan etmegiň paýyna düşýär.
Mundan başga-da, gözlegler ulanyjylaryň jyns we ýaş taýdan tapawutlaryny görkezdi: zenanlar emeli aňa, esasan, maslahat we tekst ýazmak üçin, erkekler bolsa tehniki kömek we multimedia üçin ýüz tutýar. Umuman, çat-bot zenanlar tarapyndan ýygy-ýygydan ulanylýar, ähli ulanyjylaryň, takmynan, ýarysyny 26 ýaşa çenli adamlar düzýär.
