OpenAI Apple-iň öňki baş dizaýneri Joni Aýw bilen bilelikde akylly enjamlaryň hataryny çykarmaga taýýarlanýar. The Information neşiriniň maglumatlaryna görä, ilkinji önüm displeýsiz akylly kolonka bolup biler. Beýleki önümleriň hatarynda äýnek, sanly diktofon we ýanyňda göterilýän "pin" agzalýar.
Kompaniýa eýýäm Apple-iň iPhone, AirPods, HomePod we Apple Watch öndürýän potratçylary bolan Luxshare we Goertek bilen şertnama baglaşdy. Ilkinji enjamlar 2026-njy ýylyň ahyrynda ýa-da 2027-nji ýylyň başynda peýda bolup biler.
Sem Altman ozal "enjamlar maşgalasy" ideýasyny agzapdy. Bularyň birinjisi ykjam, ekransyz we daş-töweregi seljermäge ukyply bolar. Bu häsiýetnamalar kolonka we beýleki enjamlar baradaky häzirki hasabatlar bilen gabat gelýär.
Gyzykly ýeri, Aýwyň özi öň ýanyňda göterilýän enjamlara, esasanam bedene dakylýan enjamlara şübheli garaýardy. Emma, OpenAI-yň taslamasy bu formatlary hem göz öňünde tutýar. Kompaniýanyň gulak üçin gajetleri çykarmak meýilnamasy baradaky myş-myşlar entek tassyklanylmady.
Iýul aýynda OpenAI Joni Aýwyň io başlangyjyny satyn aldy, bu bilelikdäki taslamalara garaşmaklygy güýçlendirdi. Üstesine, Apple -iň birnäçe işgäri OpenAI-a geçdi, olaryň arasynda öň Apple-iň önümleriniň dizaýnyna ýolbaşçylyk eden Tan Tan hem bar. Häzirki wagtda ol kompaniýanyň apparat ugruna ýolbaşçylyk edýär.
