Hytaýyň BYD kompaniýasy elektrik giperkarynyň täze üstünliklerini mälim etdi. Yangwang U9 Extreme (öňki U9 Track Edition) modeli Germaniýadaky Automotive Testing Papenburg synag meýdançasynda iň ýokary 496,22 km/sag tizlige ýetip, rekord goýdy.
Bu görkeziji geçen hepde gazanyldy, emma jikme-jiklikler we wideoşekiller häzir köpçülige ýetirildi.
Yangwang U9 Extreme — adaty ýollarda hereket etmäge rugsat berilýän, emma, esasan, ýaryş ýoluna niýetlenen elektrik kupedir. Ol aerodinamiki paket hem-de güýçlendirilen güýç gurluşy bilen enjamlaşdyryldy. Her bir elektromotorynyň kuwwaty 240 kWt-dan 555 kWt-a çenli ýokarlandy, netijede umumy güýç 3019 at güýjüne ýetdi.
Awtoulag aýratyn sowadyş ulgamy bolan täze batareýa bilen üpjün edildi — ol bir sagatda 30 gezek doly zarýad boşadyp bilýär. Şeýle hem onuň üçin ýörite GitiSport e·Gtr2 Pro şinalary ulanyldy, olar 500 km/s çenli tizlige çydamly.
Öndürijiniň maglumatyna görä, Yangwang U9 Extreme Nýurburgring boýunça hem öňdebaryjy boldy: “Demirgazyk petlesini” ol 6 minut 59,157 sekuntda geçdi. Bu görkeziji Xiaomi SU7 Ultra-nyň (7 minut 4,957 sekunt) wagtyndan has gowy netijedir.
Täze giperkar dünýä bazary üçin diňe 30 sany nusgada çykarylar, bahalary entek yglan edilmedi. Standart U9 bolsa Hytaýda 1 680 000 ýuandan (takmynan 236 müň dollar) başlanýan bahadan satylýar.
