Indoneziýanyň hökümeti ýurduň paýtagtyny Jakarta şäherinden Nusantara göçürmek işini 2028-nji ýyla çenli tamamlajakdygyny mälim etdi. Bu barada Prezidentiň administrasiýasynyň başlygy Muhammad Kodari habar berdi.
Nusantara doly syýasy merkez derejesini almak üçin ol ýerde kanun çykaryjy we kazyýet edaralaryny ýerleşdirmek boýunça binalar toplumy gurulýar.
«Diňe Prezident köşgi bolup, kanun çykaryjy we kazyýet edaralary bolmasa, hökümet nädip netijeli işlesin?» diýip, Jakarta Globe neşiri Kodariniň sözlerini ýetirýär.
Bu taslamanyň başyny öňki Prezident Joko Widodo başlapdy. Ilkibaşda gurluşygy 2024-nji ýyla çenli tamamlamak meýilleşdirilipdi, emma koronawirus pandemiýasy bu işe päsgelçilik döretdi. Täze Prezident Prabowo Subianto gurluşygy dowam etdirmäge taýýardygyny aýtdy.
Paýtagtyň göçürilmeginiň zerurlygy Jakartanyň çenden aşa köp ilatly bolmagy bilen baglanyşykly: şäherde her bir inedördül kilometre 15,7 müňden gowrak adam düşýär. Täze paýtagty gurmagyň bahasy 32 milliard dollardan gowrak diýlip çaklanylýar.
