2025-nji ýylyň oktýabrynda Neuralink hassalara öz pikirlerini gönüden-göni tekste öwürmäge mümkinçilik berjek beýni implantynyň kliniki synaglaryna başlar. Bu implant sözleýşe jogap berýän myşsalary dolandyrmak mümkinçiligini ýitiren adamlara kömek etmeli diýip, Bloomberg habar berýär.
Ozal implantly hassalaryň biri ony kompýuterde sözlem ýazmak üçin ulandy, ýöne synaga gatnaşyjylaryň köpüsi ünsüni, esasan, syçanjygyň kursoryny dolandyrmaga gönükdirýär. Olaryň biri neýroimplant bilen kompýuteriň baglanyşygy arkaly senagat dizaýnynda işleýär.
Neuralink-iň prezidenti D.Seonyň aýtmagyna görä, täze tapgyr nerw impulslaryny sözlere öwürmäge mümkinçilik berer. Munuň üçin implantyň kämilleşdirilen, ýöne heniz amerikan düzgünleşdirijileri tarapyndan tassyklanmadyk, diňe synaglar üçin ýörite rugsat berlen görnüşi ulanylar. Häzirki wagtda kompaniýa bu ugurda bäş dürli kliniki synaglary alyp barýar.
Bazarda entek gönüden-göni pikirleri tekste öwürýän enjam ýok. Geljekde Neuralink implanty sagdyn adamlaryň hem oturdyp bilmegi üçin sarp ediş bazaryna çykmagy göz öňünde tutýar. Bu maglumat alyş-çalşygyny çaltlaşdyrmaga we klawiatura ýaly araçy bolmazdan dil modelleri bilen gatnaşmaga, jogaplary hem simsiz nauşnikler arkaly kabul etmäge mümkinçilik berer.
Şeýle-de, kompaniýa görşi bölekleýin dikeltmek we Parkinson keseli bilen göreşmek üçin implantlary işläp taýýarlamagy meýilleşdirýär. Synaglaryň ilkibaşdaky möhletleri biraz üýtgedi: iýulda olaryň sentýabryň ahyryna çenli başlajakdygy aýdylypdy.
