Astronomlar ilkinji gezek polýar şöhlelenmesi wagtynda “Jeýms Uebb” teleskopynyň kömegi bilen Saturnyň atmosferasyny giňişleýin öwrendi. Bu hem planetanyň gaz gatlaklarynda üýtgeşik şekilleri ýüze çykarmaga mümkinçilik berdi. Bu barada Ýewropanyň planetologik kongresiniň (EPSC) metbugat gullugy habar berdi.
Hususan-da, alymlar “altyburçly ýyldyza” we biri-biri bilen bagly bolan gara tegmilleriň toplumyna syn etdi. Alymlar olary “monjuk” diýip atlandyrdy.
Gözegçilik on sagat dowam etdi we onuň dowamynda teleskopyň kameralary infragyzyl diapazonda Saturnyň atmosferasynyň şöhlelenmesini yzarlady. Astronomlar gara “monjuklaryň” polýar şöhlelenmesiniň alawlamasyna beýleki gazlardan başgaça reaksiýa berendigine, birnäçe sagat durnukly bolup, soňra üýtgäp başlandygyna üns berdi.
Stratosferada, takmynan, 500 km çuňlukda alymlar altyburçly ýyldyza meňzeýän gara şekili gördi. Ýöne onuň şöhleleri doly däldi. Häzirlikçe muňa düşündiriş ýok, ýöne bu hadysalaryň atmosferada has uly prosesler, şol sanda onlarça ýylyň dowamynda Saturnyň demirgazyk polýusynyň töwereginde aýlanýan 30 müň km diametrli altyburçly “baky” tupan bilen baglanyşykly bolup biljekdigi öňe sürülýär.
