Özbegistan 2028-nji ýylyň oktýabr aýyna çenli ilkinji özbek kosmonawtyny älem giňişligine ibermegi maksat edinýär. Bu barada Özbekkosmos agentliginiň direktorynyň orunbasary Muhiddin Ibragimow habar berdi. Onuň aýtmagyna görä, älem sapary 14 gün dowam eder.
Häzirki wagtda Özbegistan dünýäniň iň iri älem döwletleri bilen gepleşikler geçirýär. Ibragimow bu baradaky interwýusynda:«Dünýäde adamly älem uçuşlaryny amala aşyryp bilýän üç sany döwlet bar: ABŞ, Russiýa we Hytaý. ABŞ we Russiýa kosmonawtlary Halkara kosmos stansiýasyna iberýärler. Hytaýyň bolsa özüne degişli aýrybaşga älem stansiýasy bar. Biz häzir ähli taraplar bilen gepleşikleri geçirýäris we olar hyzmatdaşlyga taýýardygyny bildirdi. Biziň kosmonawtymyz älemden eli boş dolanman, öz ýany bilen, iň bolmanda, belli bir ylmy synaglaryň netijelerini getirer» diýip, matlaplaryny düşündirdi.
Ilkinji kosmonawty taýýarlamak üçin hökümet komissiýasy dörediler we olar dalaşgärleri saýlap alarlar. Kosmonawt bolmak isleýänlere bildirilýän esasy talaplar şulardan ybarat:
- Ýaşy: 27 — 40 ýaş aralygy;
- Bilimi: ýokary;
- Boýy: 160 — 190 sm aralygy;
- Agramy: 50 — 95 kg aralygy;
- Dil bilimi: daşary ýurt dillerini bilmeli.
Golaýda Özbegistanyň Prezidentine ýurtda ilkinji hemrany uçurmak we ilkinji özbek kosmonawtyny taýýarlamak boýunça alnyp barylýan işleriň deslapky tapgyrlary barada hasabat berildi.
