BookRetreats syýahatçylyk gullugy bagtly dynç alyş üçin iň gowy şäherleriň sanawyny çap etdi. TimeOut neşiriniň habar bermegine görä, sanawda Lissabon birinji orunda durýar.
Hünärmenler “Dynç alyşda bagtyň indeksi” düzülende dünýäniň 47 şäherine bäş ölçeg: Gün şöhlesiniň mukdary, ukynyň hili, sagdyn iýmitiň bolmagy, tebigata golaýlyk we beden maşklary üçin şertleriň bolmagy esasynda baha berdiler.
Portugaliýanyň paýtagty faktorlaryň utgaşmasynyň netijesinde birinji ýeri eýeledi. Şäherde köp sanly sagdyn iýmitli restoranlar bar, şäher ykjam we gezelenç üçin amatly, daglyk ýerleri fiziki taýdan işjeň bolmaga höweslendirýär. Goşmaça artykmaçlygy köp sanly ýaşyl zolaklary öz içine almagydyr, olar Madriddäkiden dört esse köp we ýylda 2828 sagat güneşli bolýar.
Ikinji orunda Finlýandiýanyň Helsinki şäheri durýar. Bilermenler "tokaý ýollaryna bökdençsiz akýan köp sanly seýilgähleri we bagýodalary bar, olar ýuwaşlyk bilen tokaý ýodalaryna sepleşip gidýär", şeýle hem "durmuşyň depgini rahat" diýip bellediler.
Şeýle hem, ilkinji bäşlige Orlando (ABŞ), Afiny (Gresiýa) we Edinburg (Şotlandiýa) girdi.
Ondan öň, iýun aýynda The Economist žurnaly ýaşamaga iň amatly şäherleriň ýyllyk sanawyny neşir edipdi. Şonda Kopengagen birinji ýeri eýeläp, Wenany ikinji ýere süýşüripdi.
