Italiýada adaty bolmadyk ýaryş geçirildi — oňa üç sany özboluşly Fiat Panda gatnaşdy. Ýaryşa dünýäniň iň gysga, iň inçe we iň pes maşynlary atlaryna dalaş edýän ulaglar gatnaşdy. Netijede iň gysga ulag ýeňiş gazandy. Wideo carmagheddon Instagram sahypasynda paýlaşyldy.
Wideoda görnüşi ýaly, diňe iň gysga Panda adaty benzinli hereketlendirijisini saklap galypdyr. Inçe we pes görnüşlerde bolsa ol sygmandygy sebäpli kiçi elektrik motorlar ulanyldy. Ýöne trassada olar benzinli motor bilen bäsleşip bilmediler.
«Inçe» maşynda sürüji adaty ýagdaýda oturýar, ýöne salon gaty dar. Rul bar, emma örän kiçi.
«Pes» ulagda bolsa sürüji yzky penjireden süýşüp, diýen ýaly ýatyp girýär we ulagy joýstik bilen dolandyrýar. Bu modelde karta degişli şassi ulanylypdyr.
Bu awtoulaglaryň resmi dünýä rekordlary tassyklanmady, ýöne olaryň ölçegleri özleri hakda aýdyp dur. Şeýle synanyşyklary bolsa ýygy-ýygydan görmek bolýar. Mysal üçin, 2024-nji ýylda Marokkoda iki esse daraldylan Jeep Wrangler görkezilipdi.
