Broad Arrow auksion öýi we SBX onlaýn platformasy auksiona gatnaşmak üçin arzalaryň kabul edilip başlanandygyny habar berdi, onuň esasy harydy - Bugatti La Voiture Noir özboluşly superkary bolar. Bu awtoulag bir nusgada çykarylan we bir wagtlar dünýäde iň gymmat täze awtoulag hasaplanýardy.
Häzirki eýesiniň ady aýan edilmeýär. Geljekde boljak geleşigiň bahasy we täze alyjynyň ady hem gizlin bolup galar, gurnaýjylar söwdalaşyklarda gizlinlik düzgüniniň gaty pugta berjaý ediljekdigini öňünden mälim etdiler.
Bugatti La Voiture Noir-ni 2019-njy ýylda Ženewada konsept hökmünde görkezipdi we iki ýyldan soň bolsa önümçilik wersiýasynyň suratlary peýda bolupdy. Onuň nominal bahasy 11 million ýewrody, ýöne resmi däl maglumatlara görä, awtoulag üçin tölenen salgydy hem göz öňünde tutsaň, takmynan, 17 million tölenipdir.
Bu model XX asyryň ortalaryndaky seýrek Bugatti Type 57 SC Atlantic-iň häzirki zaman interpretasiýasy hökmünde döredildi. Tehniki taýdan bu awtoulag Chiron platformasyna esaslanýar we 1500 at güýji bolan W16 hereketlendirijisi bilen enjamlaşdyrylandyr.
2019-njy ýylda görkeziljek mahaly awtoulagyň eýýäm eýesi bardy. Dürli çaklamalara görä, onuň Volkswagen-iň öňki başlygy Ferdinand Piýeh ýa-da portugaliýaly futbolçy Kriştianu Ronaldu bolmagy mümkin, ýöne bu maglumatlar hiç haçan tassyklanman galypdy.
