Britaniýanyň "Car and Classic" auksion öýünde seýrek duş gelýän awtoulag — 1966-njy ýylda öndürilen Jensen FF modeliniň prototipi satuwa çykaryldy. Bu model ähli tekerleri çekýän (doly çekişli) ilkinji seriýalaýyn ýeňil awtoulag hasaplanýar.
Şeýle prototipleriň jemi 12-si öndürilip, biziň günlerimize çenli olaryň diňe sekizisi saklanyp galypdyr.
"FF" gysgaltmasy "Ferguson Formula" diýmekdir. Jensen kompaniýasy "Ferguson Research" kärhanasynyň lisenziýasy esasynda doly çekişli (4WD) ulgamyny ulandy. Şeýle-de, awtoulagda şol döwür üçin iňňän seýrek tehnologiýa bolan "Dunlop Maxaret" mehaniki tormozlaryň blokirlenmäge garşy ulgamy (ABS) bardy.
Adaty ýagdaýda çekiş güýjüniň 33%-i öňdäki tekerlere, 67%-i bolsa yzky tekerlere berilýär, ýöne ýoluň şertlerine görä bu gatnaşyk üýtgäp bilýär. Awtoulagyň gurluşynyň özboluşly aýratynlygy bar: Jensen FF diňe sag tarapdan dolandyrylýan (rul sagda) görnüşde öndürildi, sebäbi kuzowyň çep tarapy transmissiýa bölekleri bilen doludy.
Auksiona çykarylan nusga 6,3 litrlik atmosferaly V8 hereketlendiriji we üç basgançakly awtomatiki berlişler gutusy bilen üpjün edilen. Bu modeliň mehaniki görnüşi (MKP) asla bolmandyr. Awtoulag asyl şaýlaryny, şeýle hem zawod tarapyndan goýlan daşky we içki reňklerini saklap galypdyr. Geçen ýyllaryň dowamynda ol birnäçe eýesini çalyşdy we Şwesiýada doly abatlaýyş (restawrasiýa) işlerinden geçirildi.
Bu lotuň gymmatlygyny artdyrýan ýene bir zat — onuň italýan "Vignale" dizaýn studiýasy tarapyndan döredilen kuzowly 12 prototipiniň biri bolmagydyr.
Ulagyň seýrekligini göz öňünde tutsaň, onuň bahasynyň bazardaky adaty Jensen FF modellerinden has ýokary bolmagyna garaşylýar.
