18-nji sentýabrda Awazada Türkmenistanyň maýa forumynyň (TIF-2025) çäklerinde dürli ugurlarda ylalaşyklary berkidýän ikitaraplaýyn resminamalara gol çekildi.
Hususan-da, Türkmenistanyň maliýe we ykdysadyýet ministri M.Astanagulow bilen Bütindünýä bankynyň Türkmenistandaky we Gazagystandaky hemişelik wekili Andreý Mihnew «Pandemiýalaryň öňüni alyş maksatlaýyn gaznasy» boýunça grant bermek baradaky ylalaşyga gol çekdiler. Resminama Merkezi Aziýada «Bitewi saglygy goraýyş» sebit taslamasyny durmuşa geçirmek üçin gönükdirilip, onuň maksady azyk ulgamlaryny goramak we ekoulgamlaryň saglygyny goldamakdan ybaratdyr.
Türkmenistanyň Senagat we gurluşyk önümçiligi ministrligi Awstriýanyň Primetals Technologies Austria GmbH kompaniýasy bilen özara düşünişmek baradaky Ähtnama baglaşdy. Resminama ministr T.Nurow bilen kompaniýanyň baş wise-prezidenti Andreas Lemp tarapyndan gol çekildi. Mitsubishi Heavy Industries toparynyň düzümindäki metallurgiýadaky innowasiýalar merkeziniň biri hökmünde Primetals Technologies Türkmenistanda pudagy ösdürmek üçin döwrebap tehnologiýalara elýeterliligi üpjün eder.
Türkmenistanyň Söwda-senagat edarasy Günbatar Londonyň Söwda edarasy (WLCC) bilen özara düşünişmek barada Ähtnama baglaşdy. Resminama TSSP-niň başlygynyň orunbasary A.Nazarow we WLCC-niň prezidenti Kristofer Durkin tarapyndan gol çekildi. Bu ylalaşyk WLCC-niň dünýäniň dürli ýurtlaryndaky hyzmatdaşlary bilen bolan gatnaşyklary arkaly türkmen kompaniýalarynyň halkara bazaryna çykmagy üçin mümkinçilikleri açar.
Türkmenistanyň Maliýe we ykdysadyýet ministrligi dünýäniň 1200-den gowrak erkin ykdysady zolaklaryny we parklaryny birleşdirýän Bütindünýä Erkin Zolaklar Guramasy (World FZO) bilen özara düşünişmek baradaky Ähtnama baglaşdy. Resminama ministr M.Astanagulow bilen World FZO-nyň Merkezi Aziýa boýunça bölüminiň ýolbaşçysy Ýerbol Buharbaýew tarapyndan gol çekildi.
