Awstraliýada hojalyk plastikasyny peýdaly ulanmagyň täze usulyny oýlap tapdylar. Edit Kouen uniwersitetinden (ECU) alymlar paketleri, çüýşeleri we beýleki plastik galyndylary ýol örtügi üçin bitum garyndysyna goşmagy teklip etdi. Ilkinji şeýle asfalt eýýäm taýýarlandy we indi ony hakyky şertlerde synagdan geçirmek meýilleşdirilýär.
Ylmy gözlegçilerden Ali Godratiniň aýtmagyna görä, plastikleriň ulanylmagy diňe bir galyndylary azaltman, eýsem şol bir wagtyň özünde asfalt-betonyň berkligini ýokarlandyrýar. MDPI-de neşir edilen ylmy gözlegde termoplastlaryň öz ereme temperaturasy netijesinde bitum bilen has gowy birleşýändigi bellenilýär. Proses goşmaça energiýa çykdajysyny talap etmeýär we zyýanly maddalary bölüp çykarmaýar.
Plastigiň goşulmagy çyg, gury ýa-da garyşyk usul arkaly amala aşyrylyp bilner. Çyg usul materiallaryň biri-biri bilen has gowy birleşmegine mümkinçilik berip, mikroplastik zyňyndylaryny azaldýar. Gurak usul bolsa amaly aňsatlaşdyrýar, ýöne ol deň ýaýradylman biler.
Alymlar ýol örtüginiň awtomobilleriň hereketinde, ýagynlarda we temperatura üýtgemelerinde özüni nähili alyp barýandygyna düşünmek üçin hakyky synaglaryň zerurdygyny belleýär. Plastigiň aşa köp bolmagy asfalty ejiz edip, daşky gurşawa-da täsir edip biler.
Hojalyk plastikasynyň asfaltda ulanylmagy, çaklamalara görä, 2050-nji ýyla çenli ýylda 1 trln tonna ýetip biljek plastik galyndylaryny, iň bolmanda, bellibir derejede azaltmaga mümkinçilik berer.
