Microsoft korporasiýasy Windows 11-e internet tizligini barlamak funksiýasyny goşmaga taýýarlanýar. Tom's Hardware çeşmesiniň maglumatlaryna görä, bu mümkinçilik eýýäm Canary, Dev we Beta kanallarynda operasion ulgamyň deslapky wersiýalarynda elýeterli.
Täze funksiýadan peýdalanmak üçin ýumuşlar panelinde ulgam birikmesiniň nyşanyna syçanjygyň sag düwmesi bilen basmaly ýa-da “Çalt Wi-Fi sazlamalary” menýusyny açmaly. Şondan soň ulanyjy tizligi barlamak üçin Bing hyzmatyna ugrukdyrylar. Çeşmäniň maglumatlaryna görä, bu funksiýa doly derejede ulgamyň içinde işlemän, häzirlikçe üçünji tarap hyzmatlaryny peýdalanýar.
Mundan başga-da, Microsoft Bluetooth sazlamalarynda ykjam gurluşlar üçin sahypany täzelemegiň üstünde işleýär. Onda ähli birikdirilen telefonlar görkeziler we gönüden-göni ulgamdan olaryň funksiýalaryny dolandyrmak mümkinçiligi peýda bolar.
Şeýle-de, gizlinlik we howpsuzlyk sazlamalarynyň bölümleri gaýtadan işlenýär. Olar täze atlaryň, düşündirişleriň we “fon EA ýumuşlary” sahypasynyň kömegi bilen has düşnükli ediler.
Üýtgeşmeler Windows Insider programmasyna gatnaşyjylar üçin elýeterli bolan 26220.6682 we 26120.6682 (KB5065782) wersiýalarynda ýüze çykaryldy. Bellenilişi ýaly, olar Windows 11-iň ahyrky wersiýasyna goşmak üçin kepillendirilmedik we üýtgäp biler.
