Halkara futbol federasiýasy (FIFA) oýunçylary 2026-njy ýylyň dünýä çempionatynyň saýlama we ahyrky tapgyr oýunlaryna gatnaşýan klublara 355 mln dollar tölär. Bu barada guramanyň metbugat gullugy habar berdi.
Ilkinji gezek töleg oýunçylaryny diňe bir ýaryşyň özüne däl, eýsem saýlama oýunlaryna gatnaşdyrýan klublara hem berler.
2022-nji ýylda Katarda geçirilen dünýä çempionatynyň netijesi boýunça FIFA 209 mln dollary alty konfederasiýa girýän 51 milli assosiasiýadan 440 klubuň arasynda paýlady.
Bu töleg ulgamy 2023-nji ýylda FIFA bilen Ýewropa klublarynyň assosiasiýasynyň (ECA) arasynda gol çekilen özara düşünişmek baradaky ähtnama esaslanýar.
“2026-njy ýylyň dünýä çempionaty üçin FIFA-nyň klub tölegleriniň programmasynyň giňeldilen görnüşi – bu öňe tarap ýene bir ädim bolup, dünýädäki köp klublaryň we oýunçylaryň hem saýlama, hem final ýaryşlarynyň geçirilmegine goşýan ägirt maliýe goşandyny ykrar edýär” – diýip, FIFA-nyň prezidenti Janni Infantino aýtdy.
2026-njy ýylyň dünýä çempionaty 11-nji iýundan 19-njy iýul aralygynda ABŞ-da, Meksikada we Kanadada geçiriler. Ýaryşa ilkinji gezek 48 ýygyndy gatnaşar.
