The Ring žurnaly boýunça amerikaly boksçy Terens Krouford agram derejesine garamazdan (p4p) dünýäniň iň gowy boksçylarynyň reýtinginde birinji orna çykdy.
14-nji sentýabrda Krouford emin agzalarynyň biragyzdan karara gelmeginde meksikaly Saul “Kanelo” Alwaresi ýeňip, ikinji orta agramda (76,2 kg çenli) absolýut dünýä çempiony titulyna eýe boldy. Onuň üçin bu üç dürli agram derejesinde üçünji absolýut çempion ady boldy. 37 ýaşly türgen karýerasyndaky 42 söweşiň ählisinde ýeňiş gazandy.
The Ring-iň täzelenen reýtinginde Krouford super agyr agramda absolýut dünýä çempiony, ukrainaly Aleksandr Usikden öňe geçdi. Üçünji orunda ikinji iň ýeňil agramda (55,22 kg çenli) absolýut çempion, ýaponiýaly Naoýa Inoue ýerleşýär. Dördünji we bäşinji orunlary ozal ýarym agyr agramda (79,37 kg çenli) absolýut çempion titullaryna eýeçilik eden Dmitriý Biwol we Artur Beterbiýew eýeleýär.
Krouford bilen Alwaresiň söweşi XXI asyrda erkekleriň arasynda iň köp tomaşa edilen çempionlyk söweşi boldy. Netflix-iň maglumatlaryna görä, oňa ABŞ, Meksika, Beýik Britaniýa, Argentina, Awstraliýa, Kanada, Irlandiýa we Filippinler ýaly 30 ýurtda 41,4 million adam tomaşa etdi. Göni ýaýlymda söweşe 20 milliondan gowrak adam tomaşa etdi.
Zenanlaryň çempionlyk söweşleriniň arasynda rekordy 2024-nji ýylyň noýabrynda Keti Teýlor bilen Amanda Serrano goýdy – olaryň söweşine 74 million adam tomaşa etdi. Iň meşhur söweş bloger Jeýk Pol bilen Maýk Taýsonyň arasyndaky söweş bolup galýar – söweşiň çempionlyk däldigine garamazdan, oňa 108 million adam tomaşa etdi.
Şeýle-de, Krouford bilen Kanelonyň söweşi ýapyk binadaky tomaşaçylaryň sany boýunça ABŞ-nyň boks taryhynda ikinji orny eýeledi. Guramaçylar şol gün aşgam 70 482 adamyň gatnaşandygyny habar berdi. Bu rekord eýesiniň – Alwares bilen Billi Jo Sondersiň söweşinden (73 126 tomaşaçy) az, ýöne mundan öň ikinji orny eýelän Mohammed Ali bilen Leon Spinksiň arasyndaky rewanş söweşinden (63 352) ep-esli köpdür.
Görkezijiler şol gün agşam binada bolan ähli adamlary, şol sanda işgärleri, goragçylary, boksçylary we guramaçylary öz içine alýar.
