14-nji sentýabrda Las-Wegasdaky Allegiant Stadium arenasynda (Newada ştaty, ABŞ) professional boks agşamy geçirildi. Ikinji orta agramda (76,2 kg çenli) jedelsiz dünýä çempiony tituly ugrunda bolan esasy söweşde meksikaly Saul “Kanelo” Alwares bilen amerikaly Terens “Bad” Krouford duşuşdy.
Söweş 12 raund dowam edip, emin agzalarynyň biragyzdan karara gelmeginde Kroufordyň ýeňmegi bilen tamamlandy – 116:112, 115:113, 115:113. Bu ýeňiş oňa absolýut dünýä çempiony adyny getirdi.
Bad Kanelo degişli bolan WBC-niň, Bütindünýä boks assosiasiýasynyň (WBA Super), Bütindünýä boks guramasynyň (WBO) we Halkara boks federasiýasynyň (IBF) wersiýalary boýunça çempion titullaryna eýe boldy.
Krouford üçin bu häzirki agramda ilkinji çykyşy boldy. Ol häzirki döwürde üç dürli agram derejesinde absolýut çempion bolmagy başaran ilkinji boksçy hökmünde taryha girdi.
Ozal Krouford birinji ýarym orta (63,50 kg çenli) we ýarym orta agramlarda (66,67 kg çenli) absolýut dünýä çempiony bolupdy.
37 ýaşly Krouford ýeňilmän galýar. Alwares bilen söweşde gazanylan ýeňiş onuň üçin professional karýerasynda 42-nji boldy.
35 ýaşly Saul Alwares karýerasynda üçünji ýeňlişine sezewar boldy, şeýle-de onuň hasabynda 63 ýeňiş we iki deňme-deňlik bar.
