Koreýa Respublikasynyň Bilim ministrliginiň Halkara Bilim instituty ýokary bilim almak üçin döwlet talyp hakly maksatnamasyna (GKS) arzalaryň kabul edilip başlanandygyny mälim etdi. Bu maksatnamanyň çäklerinde Türkmenistanyň raýatlary üçin ilçihana arkaly bakalawr maksatnamasyna iki orun berilýär. Bu barada ORIENT agentligi Koreýanyň ilçihanasynyň sosial ulgamlaryna salgylanyp habar berdi.
Hödürlenýän orunlaryň biri esasy GKS maksatnamasy boýunça, beýlekisi sebit R-GKS maksatnamasy boýunça.
Resminamalar diňe onlaýn görnüşde 2025-nji ýylyň 15–30-njy sentýabry aralygynda (Koreýa wagty boýunça, GMT+9) resmi web sahypada kabul edilýär: www.studyinkorea.go.kr.
Saýlap almak iki tapgyrdan ybarat. Birinji tapgyryň netijeleri 10-njy oktýabrdan soň yglan ediler, şondan soň saýlanan dalaşgärler bilen aýratyn söhbetdeşlik geçiriler.
Ilçihana gatnaşyjylara maksatnamanyň resmi gollanmasyny we resmi web sahypadaky ýygy-ýygydan berilýän soraglar bölümini öňünden ünsli öwrenmegi maslahat berýär.
