Microsoft kompaniýasy Windows 10 operasion ulgamyna goldawyň ýene 28 günden tamamlanjakdygy barada duýduryş berdi. Bu Windows 10 2015 LTSB we Windows 10 IoT Enterprise LTSB 2015 wersiýalaryna hem degişlidir. 14-nji oktýabrdan soň ulanyjylar soňraky howpsuzlyk täzelenmelerini we tehniki goldawy almazlar.
Microsoft-yň Habarlar merkeziniň habarnamasyna görä, Home, Pro, Enterprise, Education we IoT Enterprise neşirlerinde Windows 10-nyň 22H2 wersiýasyny goldamak 2025-nji ýylyň 14-nji oktýabrynda tamamlanar. Oktýabr aýyndaky howpsuzlyk täzelenmesi olar üçin iň soňky bolar.
Patçlary almagy dowam etdirmek üçin ulanyjylara enjamlaryny Windows 11-e çenli täzelemek ýa-da Windows 365 hyzmatyny ulanmak maslahat berilýär. Giňeldilen howpsuzlyk täzelenmeleri (ESU) programmasy hem bar: her enjam üçin şahsy adamlara - ýylda 30 dollar, işewür müşderilere - 61 dollar. Adaty ulanyjylar Microsoft Rewards ballaryny ulansalar ýa-da maglumatlary sinhronlamak üçin Windows ätiýaçlyk aýratynlygyny işjeňleşdirseler, ESU-a mugt girip bilerler. Windows 10-ly wirtual maşynlarynyň eýeleri we Windows 365 arkaly Windows 11 Cloud PC-i ulanýanlar goşmaça tölegsiz täzelenmeleri alyp bilerler.
Ýöriteleşdirilen enjamlar üçin niýetlenen Long-Term Servicing Channel (LTSC) wersiýalary alternatiwa bolup galýar. Windows 10 Enterprise LTSC 2021 2027-nji ýylyň 12-nji ýanwaryna çenli, LTSC 2019 wersiýasy bolsa 2029-njy ýylyň 9-njy ýanwaryna çenli goldanar.
Ondan öň Kaliforniýanyň ýaşaýjysy Lourens Kleýn Microsoft-yň “Windows 11-däki Copilot ýaly AI hyzmatlaryny işletmek üçin müşderileri optimallaşdyrylan täze enjamlary satyn almaga mejbur etmek maksady bilen Windows 10-a goldawyň bes edilýändigini” öňe sürüpdi.
Statcounter Global Stats-yň maglumatlaryna görä, Windows 11 eýýäm Windows kompýuterleriniň 53%-den gowragynda gurnalan, Windows 10 bolsa 42%-i düzýär. Geýmerleriň segmentinde Steam-iň 2025-nji ýylyň awgust aýynda geçiren pikir soraşmasyna görä, olaryň 60,39%-i Windows 11-i, 35,08% bolsa Windows 10-ny ulanýar.
