Toyota GR Corolla hot-hetçiň has ekstremal görnüşini taýýarlaýar. Onlaýn görnüşde, megerem, dilerler üçin ýapyk görkezilişde ýazga alnan görkezme nusgasynyň suratlary we wideolary peýda boldy diýip, Carscoops habar berýär.
Modeliň doly görnüşdäki ilkinji görkezilişiniň ýylyň ahyrynda bolmagyna garaşylýar.
Täze modifikasiýa kompaniýanyň adaty GRMN adyny alar. Çap edilen materiallardan çen tutsaň, awtoulag adaty GR Corolla-dan ep-esli tapawutlanýar. Onda "örküçli" we howa çalşyjy deşikli täze kapot, ganatlarda howa girişleri, täzeden işlenip düzülen teker diskleri we uly antikrylo bar. Neşiriň maglumatlaryna görä, käbir elementleri karbondan ýasalan.
Salonynda guýma şekilli oturgyçlary we täzelenen bezeg bar. Çap edilen wideoýazgyda awtoulagyň mehaniki geçiriş gutusy bilen üpjün edilendigi görünýär.
Tehniki jikme-jiklikleri entek aýan edilmedi. GR Corolla-yň esasy wersiýasy kuwwaty 304 at güýjüne we 400 Nm çenli ýokarlanýan 1,6 litr göwrümli üç silindrli turbo hereketlendirijisi bilen enjamlaşdyrylandyr. Hereketlendiriji mehaniki ýa-da awtomatiki geçiriş bilen işläp biler, ähli tekerleri hereketli.
GRMN-iň şuňa meňzeş modifikasiýasy has ykjam GR Yaris modeli üçin eýýäm öndürilýär. Onda adaty hereketlendiriji saklanyp galdy, ýöne kuzowyny güýçlendirdiler, transmissiýasyny we podweskasyny üýtgetdiler.
