Fransiýanyň Futbol federasiýasy Zinedin Zidan bilen 2026-njy ýyldaky dünýä çempionatyndan soň milli ýygyndynyň baş tälimçisi wezipesine bellenilmegi barada ylalaşyk gazandy. Zidan Didýe Deşamyň ýerine geler diýip, El Nacional gazeti habar berýär.
56 ýaşly Deşam öňümizdäki dünýä çempionatyndan soň işinden aýryljakdygyny mälim edipdi. Ol milli ýygyndy toparyna 2012-nji ýyldan bäri ýolbaşçylyk edip gelýär. Onuň ýolbaşçylygynda topar 2018-nji ýylyň dünýä çempionatynda we 2021-nji ýylyň Milletler ligasynda ýeňiji boldy, Ýewro-2016-nyň we DÇ-2022-niň finalynda oýnady.
53 ýaşly Zidan 2021-nji ýylyň maý aýynyň ahyrynda “Realyň” baş tälimçisi wezipesinden aýrylandan soň işsiz galýar. Ol “Reala” iki gezek ýolbaşçylyk etdi (2016–2018, 2019–2021). Onuň ýolbaşçylygynda “Real” üç gezek Çempionlar ligasyny, şeýle hem Ispaniýanyň çempionatynyň, UEFA-nyň Super kubogynyň, Ispaniýanyň Super kubogynyň we Klublaýyn dünýä çempionatynyň hersinde iki gezekden ýeňiş gazandy.
Abraýly L'Équipe gazeti Zidanyň Deşamyň ornuny tutmaga taýýardygyny ozal habar beripdi. Neşir Fransiýanyň milli ýygyndysynyň ady rowaýata öwrülen tälimçisiniň Ligue 1-e yzygiderli tomaşa edýändigini, Ýewropa kuboklaryny we milli ýygyndynyň oýnuny yzarlaýandygyny belleýär.
