Microsoft korporasiýasy öz noutbuklarynyň mahabatynda ýalňyşlyk bilen Apple-iň önümini ulandy. Muňa Windows Central neşiri üns berdi.
Geçen dynç güni Microsoft Surface noutbuk hatarynyň X sosial torundaky hasabynda Surface Pro enjamynyň mahabat şekili peýda boldy. Sosial torlaryň ulanyjylary ekranda iPad planşetleri üçin operasion ulgamy bolan iPadOS-yň interfeýsiniň görkezilendigine üns berdiler.
Žurnalistler suratyň tötänden ýerleşdirilendigini çaklaýarlar. Bu ýazgy aýrylmazdan ozal 24 sagat töweregi elýeterli boldy. Bu postda Surface Pro-nyň “barlaglarda iň oňat kömekçidigi” aýdylýar.
Windows Central-yň awtorlary ýalňyşlygy görkezen ulanyjylaryň teswirlerini ýatda saklady. Olaryň biri, hatda Microsoft-yň işgärleriniň hem Surface kompýuterlerini ulanmaga özlerini mejbur edip bilmeýändiklerini ýazdy. Başga biri, trillion dollarlyk kapitally kompaniýanyň şeýle ýalňyşlyk goýbermegine geň galandygyny aýtdy.
Şeýle-de bolsa, beýle säwligi hiç kimiň goýberip bilmejegine kepil ýok. Şeýlelikde, Apple-iň özi iýul aýynyň ahyrynda tötänden Samsung Galaxy Z Flip 7 smartfonyny mahabatlandyrýan wideony çap etdi. Şondan soň, teswirçiler Apple-iň hem hasabyny Samsung-yň hasabyny ýöredýän hünärmenler ýöredýän bolmaly diýip çakladylar.
