Kanberranyň (Awstraliýanyň paýtagty) etegindäki Jerrabomberranyň sebit sport toplumynyň futbol meýdançasy bir aýa çenli möhlet bilen ýapyldy. Munuň sebäbi meýdançanyň merkezi çyzygynda seýrek we goralýan guşuň – çulugyň ýumurtga guzlamagy boldy diýip, 9News neşiri habar berýär.
Täze Günorta Uelsiň milli seýilgähler we ýabany tebigat gullugy (NPWS) ýumurtgany başga ýere geçirmezligi maslahat berdi, şonuň üçin bu meýdançada meýilleşdirilen ähli oýunlar başga meýdançalara geçirildi. Bu ýerde diňe guş çagalary çykandan ýa-da höwürtge hünärmenleriň razylygy bilen göçürilenden soň oýnap bolar.
“NPWS bize höwürtgäni kem-kemden gysga aralyklara geçirmäge ygtyýarnama berdi” – diýip, sebit geňeşiniň wekili habar berdi. Onuň aýtmagyna görä, bu proses birnäçe gün ýa-da birnäçe hepde dowam edip biler. Bu ýagdaý birinji ýumurtgadan soň guşuň ýene ikisini guzlamagy bilen has-da kynlaşdy.
Çuluklar, köplenç, açyk ýerlerde, meýdançalarda ýa-da tekiz üçeklerde höwürtgelenýär. Bu guşlar ýumurtgalaryny agressiw gorap, höwürtgä golaýlaşan adamlara ýa-da haýwanlara hüjüm edýär.
