Microsoft Gyzyl deňizdäki birnäçe suwasty optiki süýüm kabellerine zeper ýetendigini habar berdi. Korporasiýa bütin dünýäde Azure bulut platformasynyň işinde gijikdirmeleriň we bökdençlikleriň bolup biljekdigini duýdurdy.
Kompaniýa Ýakyn Gündogar arkaly Aziýa bilen Ýewropanyň arasyndaky internet maglumatlarynyň başga ugurlar boýunça gyssagly gönükdirilendigini aýtdy. Şol bir wagtyň özünde, Microsoft kabellere ýeten zeperiň sebäbini aýtmady, ýöne abatlaýyş işiniň esli wagt alyp biljekdigini belledi.
Soňra kompaniýa Azure-niň işi bilen bagly näsazlyklaryň indi hasaba alynmaýandygyny aýtdy.
Suwasty optiki süýüm kabelleri global internet infrastrukturasynyň möhüm bölegidir. Olara zeper ýetmegi birnäçe meselelere getirip biler: maglumatlaryň geçirilmeginde gijikdirmeler, internet birikmesiniň tizliginiň peselmegi we onlaýn hyzmatlaryň işinde bölekleýin bökdençlikler.
Bloomberg-iň belleýşi ýaly, Gyzyl deňiz Ýewropany Afrika we Aziýa bilen birleşdirýän möhüm telekommunikasion ýol hökmünde çykyş edýär. Şol bir wagtyň özünde, bu sebitde kabelleriň abatlaýyş işleri Ýakyn Gündogardaky syýasy durnuksyzlyk bilen kynlaşýar.
