Soshiotsuki brendini esaslandyryjy, ýaponiýaly dizaýner Soşi Osuki LVMH Prize-yň ýeňijisi boldy. WWD-iň habar bermegine görä, ol 400 müň ýewro we LVMH toparynyň bilermenlerinden bir ýyllyk halypalyk sapagyny alar.
Baýragy oňa Bolliwudyň ýyldyzy, aktrisa we model Dipika Padukon gowşurdy.
Osuki, dabarada düşündirişine görä, "ýapon däp-dessurlaryny häzirki zaman ussatlygy bilen birleşdirmek" üçin 2015-nji ýylda öz brendini esaslandyrdy.
Karl Lagerfeld adyndaky ýörite eminler baýragy kagyz ýüzüne syýa bilen çeken eskizleri arkaly meşhur bolan we olary söwütli, grafiki we romantik köýneklerde durmuşa geçirýän iňlis dizaýneri Stiw O. Smite gowşuryldy.
Üçünji baýrak - Savoir-Faire baýragy - başga bir iňlis dizaýneri Torişeju Dumä gowşuryldy. Onuň hödürlän toplumy dinamiki nepisligi bilen tapawutlanýan, aýallar we erkekler üçin niýetlenen toplumlardyr. Bu baýrak tehniki innowasiýalarda iň ýokary derejäni nygtamak üçin döredildi.
Dizaýnerleriň her biri 200 müň ýewro alar we bir ýyl LVMH-niň bilermenleriniň gözegçiligi astynda bolar.
Bäsleşigiň finalçylaryny we ýeňijilerini kesgitlän eminleriň düzümine şu aşakdaky meşhur moda dizaýnerleri girdi: Sara Býorton, Jonatan Anderson, Nikolýa Žeskýer, Mark Jeýkob, Stella Makkartni, Nigo, Fibi Faýlo, Silwiýa Wenturini Fendi we Farrell Uillýams. Ses berişlige LVMH-iň wekilleri Delfina Arno, Sidni Toledano we Žan-Pol Klaweri hem gatnaşdy.
Dünýäniň dürli künjeginden bolan ýaş dizaýnerler üçin niýetlenen abraýly LVMH Prize LVMH konglomeratynyň eýesi Bernar Arnonyň gyzy Delfina Arno tarapyndan 2013-nji ýylda esaslandyryldy.
