Mýunhen awtoulag sergisiniň öňüsyrasynda BMW Neue Klasse hataryndaky ilkinji model bolan iX3 elektrik krossoweriniň täze neslini görkezdi. Satuwlar 2026-njy ýylyň ýazynda başlar.
Model täzelenen dizaýn, täze multimediýa mümkinçilikleri bolan salon gurluşyny we 805 km aralyga çenli ýol geçmäge mümkinçilik berýän batareýany aldy. Zarýad bermek 30% çaltlaşdy: batareýa 21 minutda 10%-den 80%-e çenli dolýar we 10 minutda bolsa 372 km aralyga ýetýän energiýany alyp bolýar.
Krossower 108,7 kilowat batareýa we 469 at güýçli hem-de 635 Nm kuwwatly güýç gurluşy bilen enjamlaşdyrylandyr. 100 km / sag tizlige 4,9 sekuntda çykýar, iň ýokary tizligi sagatda 210 km. Biraz soň bolsa, BMW M wersiýalaryny hem goşmak bilen, beýleki modifikasiýalarynyň çykmagyna garaşylýar.
Esasy tehnologiki täzelik dört sany hasaplaýyş moduly - hereketi, howpsuzlyk ulgamlaryny we multimediýany dolandyrýan “super beýniler” boldy. Täze BMW eDrive-yň altynjy nesliniň toplumy öňküsinden 40% netijeli we 10% ýeňildir.
Interýeri konsepte ýakyn: uly Panoramic iDrive ekrany alyn aýnanyň tutuş aşaky bölegini tutýar, goşmaça proýeksiýa ekrany hem bar. Ses dolandyryşy we üçünji tarap programmalary üçin goldaw göz öňünde tutulan.
Esasy bukjada 20 dýuýmlyk diskalar, goşa zolakly howa gözegçilik we simsiz zarýad beriş bar. Opsiýalara uýgunlaşdyrylan optika, Harman Kardon ses ulgamy we panoramik üçek girýär.
Satuwlar ilki Ýewropada başlar. 2026-njy ýylyň tomsunda iX3 ABŞ-da peýda bolar, Hytaý üçin bolsa uzaldylan görnüşi çykar. 2027-nji ýyla çenli iX3 tehnologiýalary BMW-niň onlarça modelinde ulanylar.
