5-nji sentýabrda Türkmenistanyň milli futbol ýygyndysy Merkezi Aziýanyň Futbol Assosiasiýasynyň Milletler kubogynyň (CAFA Nations Cup) toparlaýyn tapgyrynyň üçünji oýnunda Omandan utuldy. Daşkentdäki “Jar” stadionynda geçirilen oýun Omanyň futbolçylarynyň peýdasyna 1:2 hasabynda tamamlandy.
Aýgytly pursatlar oýnuň başynda we ahyrynda boldy. 12-nji minutda türkmen toparynyň derwezebany Rüstem Ahallyýew topy öz derwezesine girizdi. 51-nji minutda ýaňy meýdança çykan Welmyrat Ballakowyň topy geçirmeginde Arzuwguly Sapargulyýew deňagramlylygy dikeltdi. Toparlaryň ikisi-de oýny täzelemek üçin oýunçy çalyşmak mümkinçiliginden doly peýdalandy. Türkmenistan öňe çykmaga çalyşdy, ýöne Omanyň goragy ygtybarly boldy. 90-njy minutda Oman toparynyň hüjümçisi Muhsen Al-Gassani gutarnykly hasaby kesgitläp – 1:2, öz toparyna üç utuk getirdi.
“A” toparçanyň başga bir oýnunda Özbegistanyň ýygyndysy Gyrgyzystany 4:0 hasabynda utup, finala çykdy.
Toparlaýyn tapgyryň netijesi boýunça Özbegistan we Oman 7 utuk gazandy, ýöne geçirilen we sypdyrylan gollaryň tapawudy boýunça, toparçada birinji orny özbek futbolçylary eýeleýär. Finalda olar kubok ugrunda “B” toparçanyň öňdebaryjysy – Eýranyň milli ýygyndysy bilen oýnar. Bürünç ugrunda Oman bilen Hindistanyň milli toparlary bäsleşer.
Türkmenistanyň we Gyrgyzystanyň milli ýygyndylary 1 utuk gazanyp, medal ugrunda göreşi tamamlady.
