Audi kompaniýasy Concept C ady bilen täze prototipini hödürledi. Bu, ilkinji nobatda, geljekki modelleriň firma stilini görkezmek üçin döredilen iki orunlyk elektrik rodsterdir. Kompaniýa geljekde bu konseptiň esasynda seriýaly modelleriň çykjakdygyny tassyklady.
Concept C iki bölekden ybarat berk eplenýän üçege eýe boldy we hereketlendirijisi ortada ýerleşýän sportkarlaryň stilinde döredildi. Model uly tigir arkalary we kuzow bilen sazlaşykly birleşýän üçegi bilen tapawutlanýar. Platforma tigir bazasynyň içinde ýerleşdirilen batareýanyň töwereginde guruldy.
Prototipiň dizaýnerlik çözgütleri markanyň adaty sportkarlarynyň aýratynlyklaryny seriýaly awtomobillerde peýda boljak täze elementler bilen utgaşdyrýar. Olaryň arasynda inçe kese faralar we dört segmentden ybarat çyralar, şeýle-de kuzowyň öň böleginiň dik we kese çyzyklary bar.
Salon wintaž äheňi bilen kuzowyň stilinde ýerine ýetirildi. Onda fiziki düwmeler we metal gapy tutarlary ulanyldy. Mediaulgamyň 10,4 dýuýmlyk displeýi eplenýän görnüşde boldy, şonuň üçin suratda ol görünmeýär.
Audi-niň ýolbaşçysy Gernot Dýollner kompaniýanyň geljekde amaly häsiýete eýe bolup bilmejek konseptleri döretmeýändigini belledi. Onuň aýtmagyna görä, Concept C geljekki seriýaly modele gönüden-göni yşaratdyr. Bu model ululygy boýunça Audi TT bilen R8-iň aralygyndaky orny eýelär. Onuň peýda boljak wagty entek aýdylmady.
