Ilon Maskyň xAI kompaniýasy tizlige we işjeňlige gönükdirilen programmirlemek üçin Grok Code Fast 1 emeli aň modelini hödürledi.
Model täze arhitektura esaslanýar we giň maglumatlar toplumy bilen okadyldy. Bu işde taýýar çözgütler, programmirleme boýunça meseleler we kody üýtgetmek üçin hakyky ýüz tutmalar ulanyldy. Şonuň netijesinde Grok Code Fast 1 meşhur IDE-e goşulyp, grep gurallary, terminal we redaktorlar bilen işleýär.
Ulgam Python, TypeScript, Java, Rust, C++ we Go dillerini goldaýar. Ol taslamalary noldan döretmäge, kod bazasynyň gurluşyny seljermäge we ýalňyşlyklary düzetmäge ukyplydyr. SWE-Bench-Verified synagynda modeliň netijesi 70,8% boldy.
xAI modeli işläp taýýarlamakda programmistleriň seslenmeleriniň möhüm rol oýnandygyny belledi.
Işläp düzüjiler jogap tizligine aýratyn üns berdi. Täze keş we hyzmat usullary, köp gural ulanmaly bolsa-da, ulgama şol bada diýen ýaly işlemäge mümkinçilik berýär.
Kompaniýa her birnäçe günden täzelenme çykarmagy meýilleşdirýär. Indiki wersiýa giňeldilen kontekste we parallel gurallaryň goldawyna eýe bolar. Şeýlelikde, xAI gönüden-göni GitHub Copilot we Codex bilen bäsleşýär.
Grok Code Fast 1 ilkinji ulanyjylar üçin hepdäniň dowamynda GitHub Copilot, Cursor, Cline, Roo Code, Kilo Code, Opencode we Windsurf hyzmatdaşlyk platformalary arkaly mugt bolar. Synag döwründen soň ony API arkaly ulanmagyň bahasy million giriş tokeni üçin 0,20 dollar, million çykyş tokeni üçin 1,50 dollar we million keşlenen tokenler üçin 0,02 dollar bolar. Mundan başga-da, kompaniýa täze model üçin prompt döretmek boýunça gollanma hödürledi.
