2-nji sentýabrda Türkmenistanyň milli ýygyndysy Merkezi Aziýanyň Futbol Assosiasiýasynyň (CAFA) Milletler Kubogynyň ikinji tapgyrynda Özbegistanyň ýygyndysyna garşy oýnady. Duşuşyk Daşkentdäki «Olimpiýa» stadionynda geçirildi we ýer eýeleriniň peýdasyna 2:1 hasabynda tamamlandy.
Birinji ýarymda özbek hüjümçisi Igor Sergeýew 37-nji minutda we ondan ýedi minut soň 11 metrlik jerime urgusyndan Türkmenistanyň derwezesine gollary geçirdi.
Arakesmeden soň oýnuň gidişi üýtgedi: 59-njy minutda Özbegistanyň ýygyndysynyň kapitany Farruh Saýfiew türkmen derwezebany Resul Çaryýewe garşy gödek düzgün bozandygy üçin göni gyzyl duýduryş aldy. Derwezebany çalyşmaly boldy, emma türkmen topary sany boýunça artykmaçlyk gazandy. Milli ýygyndymyz işjeň hüjüm edip, 84-nji minutda Didar Durdyýew 11 metrlik jerime urgusyny gazandy we ony özi üstünlikli ýerine ýetirdi. Oýnuň ahyryna çenli hasap üýtgemedi.
Türkmenistan indiki duşuşygyny 5-nji sentýabrda Omanyň ýygyndysyna garşy geçirer. Şol gün Özbegistan bolsa Gyrgyzystan bilen duşuşar.
Birinji tapgyrda Türkmenistan Gyrgyzystanyň ýygyndysy bilen 1:1 hasabynda deňme-deň oýnady.
Iki tapgyrdan soň «A» toparçada Özbegistan (4 utuk) öňde barýar, şeýle hem Omanda 4 utuk bar. Türkmenistan bilen Gyrgyzystanyň hersinde 1 utukdan bar.
