Audi kompaniýasy sentýabrda Mýunhendäki awtosalonda täze konseptual kupesini hödürlemäge taýýarlanýar. Ýöne onuň ilkinji suraty eýýäm möhletinden ir Internetde peýda boldy – ol az wagtlyk brendiň Kanadadaky bölümçesi tarapyndan sosial ulgamlarda ýerleşdirildi.
Suratda awtomobil gapdaldan görkezilýär. Üçegiň liniýasy boýunça konseptiň targa stilinde aýrylýan üstüniň bolup biljekdigini çaklamak bolar. Şeýle-de, inçejik yşyk diodly çyralar, öňe çykýan bamper we uly yzky diffuzor görünýär.
Ozal kompaniýanyň baş direktory Gernot Dýollner TT Moment 2.0 taslamasy barada habar beripdi. Onuň aýtmagyna görä, geljekki model elektrik bolar hem-de TT we R8 ulaglarynyň aýratynlyklaryny utgaşdyrar. Pudak synçylarynyň maglumatlaryna görä, sportkar täze nesil Porsche 718-iň esasynda gurlup bilner.
Bir gün öň Germaniýadaky awtoulag sergisinde Audi tizer çykaryp, markanyň taryhyny ýatlap geçdi: irki TT modellerini we meşhur Auto Union Type C hem D “kümüş oklaryny” görkezdi.
