Ýaponiýaly binagär, abraýly Pritzker baýragynyň eýesi Tadao Ando Özbegistanyň Milli muzeýiniň binasyny taslar. Muzeý 2028-nji ýylyň martynda Daşkentde açylar diýip, Hypebeast ýazýar.
Bu Andonyň Merkezi Aziýada ilkinji taslamasy bolar. Binanyň arhitekturasy Özbegistanyň medeni mirasyndan ylham alýar we Ando üçin mahsus bolan minimalizm stilinde ýerine ýetirilýär.
Bina tegelek we gönüburç şekilleri utgaşdyrýar. Muzeýiň daşky görnüşini aýna geçelgeler bilen gurşalan merkezi howla eltýän giň aýlaw arkalar bezär.
Tadao Ando bu taslamany Atelier Brückner nemes studiýasy bilen hyzmatdaşlykda durmuşa geçirer. Muzeýde hemişelik we wagtlaýyn sergiler, çeper rezidensiýalar we okuw ýerleri, şol sanda köpçülikleýin kitaphana we leksiýa zaly ýerleşdiriler.
Muzeý ýurduň öňdebaryjy medeni merkezi hökmünde göz öňünde tutulýar. Ol özbek medeniýeti bilen ýakyndan tanyşmaga mümkinçilik berer we duşuşyklar hem oýlanmalar üçin jemgyýetçilik ýerine öwrüler.
Tadao Ando dünýäde regionalizm ruhunda işleýän iň belli binagärleriň biridir. Ol öz taslamalarynda tebigy ýagtylygy ussatlyk bilen ulanýar. Onuň belli işleriniň arasynda Missuridäki Pulitser sungat merkezi, Kiotodaky Sungat muzeýi we Osakadaky Ýagtylyk buthanasy bar.
