Aşgabat şäheriniň 86-njy orta mekdebiniň 2-nji synp okuwçysy Kerim Babaýew Abu-Dabide geçirilen 31-nji Halkara küşt festiwalynyň kümüş medalyna mynasyp boldy. Ýaryşlar Radisson Blu myhmanhanasynda geçirilip, ol 83 ýurtdan 3000-den gowrak gatnaşyjyny özünde jemledi diýip, Türkmenistanyň Küşt Federasiýasy habar berdi.
Kerim Juniors Under 16 atly bäsleşikde çykyş edip, dürli ýaş toparlarynyň netijeleri aýratynlykda hasaba alyndy. Ol 9 oýundan 5,5 utuk toplap, 32 ýurtdan gelen 293 oýunçynyň arasynda 81-nji orny eýeledi. 8 ýaşdan kiçi toparda bolsa, ol ikinji orny aldy.
Ýaş küştçi tälimçi Aýnur Isaýewanyň ýolbaşçylygynda ýaryşlara taýýarlyk görýär. Küşt Federasiýasynyň belläp geçmegine görä, bu netije diňe Kerimiň şahsy üstünlik bolman, eýsem, Türkmenistanda küşt sportunyň depginli ösýändigini hem görkezýär. Soňky dört ýylyň dowamynda türkmen küştçüleri halkara ýaryşlarynda has işjeň çykyş edip, täze nesil oýunçylary täze üstünliklere ruhlandyrýarlar.
