Italiýada 82-nji Wenesiýa kinofestiwaly öz işine başlady. Festiwalyň ilkinji güni kinematografda bitiren hyzmatlary üçin “Altyn ýolbars” hormat baýragynyň gowşurylyş dabarasy geçirildi. Şu ýyl ony germaniýaly režissýor Werner Hersog aldy. Hormat baýragyny oňa tanymal režissýor Frensis Ford Koppola gowşurdy.
Režissýor öz çykyşynda bu baýragy almagyň uly mertebedigini belledi we häzir Irlandiýada Bucking Fastard filmini düşürýändigini, “The Twilight World” romanynyň esasynda animasion taslama taýýarlaýandygyny we Pon Jun-honyň multfilmindäki gahrymanlaryň birine ses bermegi meýilleşdirýändigini aýtdy. Şol gün režissýor özüniň Afrikada düşürilen “Ruhpisint piller” (Призрачные слоны) atly täze dokumental filmini-de hödürledi.
Häzire çenli Hersog 70-den gowrak film döretdi. Şeýle-de, ol kitap ýazýar, opera goýýar, kinoda düşýär we sapak berýär.
Wenesiýadaky kinofestiwal Paolo Sorrentinonyň “Merhemet” (Благодать / La grazia) filmi bilen açyldy. Ol kinofestiwalyň esasy bäsleşigine gatnaşýar. Filmde baş keşbi Toni Serwillo ýerine ýetirdi.
Festiwalyň bäsleşik programmasyna 21 film girdi, olaryň arasynda Jim Jarmuşyň “Kaka eje uýa dogan” (Отец мать сестра брат), Fransua Ozonyň “Keseki” (Посторонний), Ketrin Bigelouwyň “Dinamitden öý” (Дом из динамита), Ýorgos Lantimosyň “Bugoniýa” (Бугония), Oliwýe Assaýasyň “Kreml jadygöýi” (Кремлёвский волшебник), Benni Sefdiniň “Ýumrujy” (Крушащая машина), Gilýermo Del Toronyň “Frankenşteýn” (Франкенштейн) filmleri we beýlekiler bar.
Şu ýyl festiwalyň emin agzalarynyň ýolbaşçysy amerikaly režissýor Aleksandr Peýn boldy. Festiwal 6-njy sentýabra çenli dowam eder.
