Xiaomi SU7 elektromobiliniň täze görnüşiniň ýol synaglaryna başlady. Nikaplanan nusganyň ilkinji suratlary Hytaýyň Weibo sosial ulgamynda peýda boldy. Car News China-nyň habaryna görä, bu modeliň uzaldylan görnüşi bolup, 2026-njy ýylda SU7 L ady bilen çykarylar.
Öndüriji bu barada entek resmi beýanat bermedi.
Adaty SU7 bilen deňeşdirilende, synagdan geçirilýän ulagyň yzky bölegi has uzaldylan. Awtoulagyň umumy uzynlygynyň 4,997 metrden takmynan 5,2 metre çenli, teker bazasynyň bolsa 80–150 millimetr artyp, 3 metre ýetmegine garaşylýar. Goşmaça giňişlik ýolagçylaryň yzky oturgyçlarynda has amatly oturmagy üçin ulanylar.
SU7 L sport häsiýetli adaty SU7-den tapawutlylykda, köp babatda rahat sedan hökmünde häsiýetlendirilýär. Ýolagçylar üçin has amatly oturgyçlar, multimediýa ekranlar we kiçiräk holodilnik bilen üpjün edilmegi meýilleşdirilýär. Asma ulgamy bolsa ýöreýiş rahatlygy bilen dolandyryşyň arasyndaky deňagramlylygy saklamak üçin täzeden sazlanar.
Hytaýly analitikleriň çaklamasyna görä, SU7 L-iň bahasy 400 müň ýuandan (takmynan 55,8 müň dollar) ýokary bolup biler. Bu bolsa ýerli bazardaky bäsdeşlerinden ep-esli gymmatdyr. Mysal üçin, doly geçirijili BYD Han L Flagship 279 800 ýuandan (39 müň dollar) başlanýar. Häzirki wagtda bolsa adaty SU7-niň başlangyç bahasy 215 900 ýuandan (30 müň dollardan sähel ýokary).
