26-njy awgustda SpaceX amerikan kompaniýasy Starship gämisi oturdylan Super Heavy raketa göterijisiniň onunjy synag uçuşyny üstünlikli geçirdi. Çäre X sosial ulgamy arkaly göni ýaýlymda görkezildi.
Kompaniýanyň berýän maglumatyna görä, synagda öňde goýlan maksatlara ýetildi we bu uçuş "dünýäde ilkinji dolulygyna köp gezeklik raketa göterijisini işläp taýýarlamakda ähmiýetli ädim» boldy.
Synag wagtynda Super Heavy raketa-tizleşdiriji kosmos gämisinden bölünip aýrylyp, Meksikan aýlagyna gondy. Starship bolsa bir sagatdan gowrak dowam eden uçuşynda birnäçe Starlink emeli hemrasynyň simulýatorlaryny orbita çykardy we soňundan Hindi ummanyna dolandyrylýan ýagdaýda gondy. Gonandan soň partlama ýüze çykdy.
SpaceX bu ýagdaýy düşündirip, prototipi saklap galmak maksatlarynyň bolmandygyny, esasy maksadyň dik gondurmak üçin ugrukdyrma mümkinçiliklerini barlamakdygyny, onuň hem üstünlikli ýerine ýetirilendigini aýtdy.
Super Heavy bilen bilelikde Starship-iň beýikligi 123 metr bolup, bu ony taryhda iň uly we iň güýçli raketa öwürýär. Taslama kosmos uçuşlarynyň bahasyny arzanlatmak üçin gaýtadan ulanylmaga niýetlenendir.
Kompaniýanyň ýolbaşçysy Ilon Mask öňräk 2026-njy ýylda Starship-iň Marsa uçup biljekdigini belläpdi. Şeýle hem NASA ony Aýa adamly uçuşlarynda ulanmagy meýilleşdirýär. Ilkinji synag uçuşlary 2023-nji ýylda başlanypdy. Mundan öň geçirilen dokuz synagyň diňe ikisi üstünlikli diýlip hasap edilipdi. Olaryň dördüsi raketa-tizleşdirijisiniň partlamasy bilen tamamlandy.
Onunjy uçuş ilkibaşda 24-nji awgusta bellenipdi, emma uçuşa birnäçe sagat galanda ýerüsti ulgamyndaky tehniki näsazlyklar sebäpli yza süýşürildi.
