Kanadada federal şikaýat kazyýeti Britan Kolumbiýasyndaky Universal Ostrich Farms fermasynda 400 düýeguşy ýok etmek baradaky çözgüdi tassyklady. Bu çäre guş dümewiniň ýaýramak howpy bilen baglanyşykly diýip, The Washington Post habar berýär.
Ferma eýeleri Karen Espersen we Deýw Bilinski 2024-nji ýylyň dekabrynda hojalykda ilkinji kesel ýagdaýy ýüze çykarylandan bäri bu çözgüde garşy çykýar. Şol wagt 36 günüň dowamynda 69 guş öldi, bu hem umumy baş sanyň, takmynan, 15%-i boldy. Olaryň ikisi guş dümewi üçin barlagdan geçirildi we analiz položitel boldy. Şondan soň Kanadanyň azyk önümleriniň hiline gözegçilik edarasy galan düýeguşlary ýok etmek barada buýruk çykardy.
Ferma eýeleri garşy çykyp, guşlaryň wirusa garşy tebigy immunitetiniň bolup biljekdigini öňe sürdi. Düýeguşlary goramak kampaniýasyna ABŞ-nyň saglygy goraýyş ministri Robert Kennedi-kiçi we belli lukmançylyk tele-şüweleňini alypbaryjy Mehmet Oz hem goşuldy. Hususan-da, Kennedi-kiçi guşlary ýok etmän, olary ylmy gözlegler we oba hojalygyny ösdürmek üçin ulanmak teklibi bilen Kanadanyň häkimiýetlerine ýüz tutdy.
Ahyrky netijede kazyýet Universal Ostrich Farms-yň arzasyny ret etdi we ýok etmek baradaky çözgüt güýjünde galdy.
“Biziň kesellere garşy göreş çärelerimiz ilatyň we haýwanlaryň saglygyny goramaga, şeýle-de 6,8 mlrd dollarlyk guşçulyk senagatymyza ýetýän täsiri azaltmaga gönükdirilendir” – diýip, Kanadanyň azyk önümleriniň hiline gözegçilik edarasynda bellenildi.
