23-nji awgustda Aý Günüň ýanyndan geçdi. Bu hadysany GOES-19 kosmos apparatyna ornaşdyrylan SUVI Gün teleskoplary ýazga aldy. Suratlar we wideo ýazgylar Aşgabat wagty bilen irden sagat 10 töwereginde, astronomik täze Aý döwründen takmynan bir sagat öň düşürildi. Şol pursatda Aý has-da gara göründi.
Gün bilen ýakynlaşandan soň Aý takmynan 29,5 gün dowam edýän orbita ýoluna ugrady. 21-nji sentýabrda bolsa ol ýene-de Günüň ugry bilen gabat gelip, Gün tutulmasyna sebäp bolar. Bu 2025-nji ýylda ikinji tutulma bolar, birinjisi 29-njy martda bolupdy.
Indiki aýda boljak Gün tutulmasyny, esasan, Täze Zelandiýanyň hem-de Antarktidanyň käbir ýerlerinden synlap bolar. Türkmenistandan ol görünmez.
Emma sentýabrda 7-sinden 8-ine geçilýän gije doly Aý tutulmasy – «ganly Aý» diýlip atlandyrylýan hadysa bolup geçer. Şol wagt Aý 82 minutlap gyzyl reňke boýalar. Bu täsinligi Aziýada, Ýewropada, Awstraliýada, Hindistanda, Hytaýda we Afrikada milliardlap adam bölekleýin synlap biler.
