23-nji awgustda Magtymguly adyndaky Türkmen döwlet uniwersitetiniň mejlisler jaýynda ýurdumyzyň bilim işgärleriniň maslahaty geçirildi. Maslahat 2024-2025-nji okuw ýylynyň jemlerini jemlemäge hem-de täze, 2025-2026-njy okuw ýylynda öňde durýan wezipeleri ara alyp maslahatlaşmaga bagyşlandy.
Maslahata Türkmenistanyň Ministrler Kabinetiniň Başlygynyň orunbasary, Bilim ministrliginiň, ýokary we orta hünär bilim edaralarynyň ýolbaşçylary, Aşgabat we Arkadag şäherleriniň, welaýatlaryň häkimleriniň degişli orunbasarlary, Baş bilim müdirlikleriniň hem-de etrap bilim bölümleriniň başlyklary, professor-mugallymlar, hünärmenler gatnaşdylar.
Gün tertibine girizilen meseleler boýunça milli we öňdebaryjy tejribelere, halkara standartlara görä, täze okuw ýylynda kadalaşdyryjy hukuk namalaryny, okuw-usuly toplumlaryny taýýarlamak, mugallymlaryň hünär derejesini ýokarlandyrmak, halypa-şägirt gatnaşyklaryny ösdürmek, maksatnamalar, strategiýalar, konsepsiýalar boýunça işleri guramaçylykly alyp barmak bilen bagly ýerine ýetirilmeli işler kesgitlenildi. Täze okuw ýylynda meýilleşdirilýän çäreler ara alnyp maslahatlaşyldy. Şeýle hem sanly bilimi ösdürmek, ýaş nesliň ders bäsleşiklerinde we olimpiadalarda üstünlikli çykyş etmeklerini gazanmak, halkara bilim bäsleşiklerini, ylmy-amaly maslahatlary guramaçylykly geçirmek, ýaşlary ylmy döredijilige, hünärlere ugrukdyrmak ýaly gyzyklandyrýan meseleler boýunça pikir alşyldy. Bilimler we talyp ýaşlar gününe guramaçylykly taýýarlyk görmek, bilim edaralarynyň maddy-enjamlaýyn binýadyny pugtalandyrmak hem üns merkezindäki meseleleriň hatarynda boldy.
