Britaniýaly Din Stouks Ginnesiň rekordlar kitabyna adyny ýazdyrdy – ol bir hepdäniň içinde "amerikan depejikleri" diýlip belli bolan 55 sany attraksionlara münüpdir diýip, BBC habar berýär.
Rekordçy ilkibaşda diňe Beýik Britaniýadaky we Irlandiýadaky şeýle attraksionlara baryp görmegi maksat edinendigini, ýöne soňundan rekord goýmagy ýüregine düwendigini aýtdy.
Stouksyň sözlerine görä, iň uly kynçylyk britan howasynyň üýtgäp durmagy bolupdyr.
«Floris» diýen tupan meniň üçünji we dördünji günki meýilnamalarymy bozdy: attraksionlar işlemegini bes etdi, iki park bolsa duýduryşsyz ýapyldy. Şeýle bolmadyk bolsady, men 60-dan gowrak "depejige" münip bilerdim!» — diýip, ol paýlaşdy.
Kynçylyklaryň biri hem logistikada ýüze çykypdyr, sebäbi parklar biri-birinden uzak aralykda ýerleşýär.
Stouksyň bu hili attraksionlara bolan höwesi ýaşlykdan başlapdyr.
«Men ilkinji gezek ýetginjek wagtym attraksion parkyna bardym we şol bada adrenalin duýgusyny haladym! Meni täze parklary tapmak, olaryň dünýäsine çümmek — bezeginden we aýdym-sazyndan başlap, attraksionlaryna çenli — örän begendirýär» diýip, ol aýtdy.
Onuň sözlerine görä, bu syýahatyň esasy maksady şowhunly dynç alyş bolupdyr:
«Bize şatlyk berýän zatlardan utanmazlygyň, tersine, bu bagtly pursatlary başgalar bilen paýlaşmagyň wagty geldi» diýip, ol belledi.
BBC-niň bellemegine görä, mundan ozal şeýle rekord bolmandyr. Onuň resmi taýdan ykrar edilmegi üçin azyndan 30 "depejik" gerekdi. Netijede, Stouks 16 günüň içinde Beýik Britaniýanyň çäginde 32 parka baryp, 108 attraksiona münüpdir.
