102 ýaşly ýaponiýaly Kokiti Akudzawa Fudzi dagyna çykan iň garry adam hökmünde Ginnesiň rekordlar kitabyna girdi.
Adatça, daga çykmak 6 – 10 sagat wagt alýar, ýöne ol organizme agram salmazlyk üçin bu ýoly üç günde geçdi: Kokiti ýürek nogsanlygyndan ejir çekýär. Ol gijesini dagdaky çatmalarda geçirdi.
Ilkinji iki gün kynçylyksyz geçdi, ýöne üçünji gün Akudzawa kislorod ýetmezçiligi, gan basyşynyň peselmegi, sowuk we güýçli ýel bilen ýüzbe-ýüz boldy. Ol daga çykmagyny dowam etdirmelidigi barada ikirjiňlenip başlady, ýöne gyzy ony dowam etdirmäge ynandyrdy.
Ozal goja Fudzi dagyna ençeme gezek çykypdy, soňky gezek 96 ýaşynda çykdy. Ýöne bu gezek çykmak öňkülerden kyn boldy.
“Bu kyn boldy we duýgular hem geçenki gezekden düýbünden başgaçady. Men çykyp bilendigime haýran galýaryn. Beýlekileriň kömegi bolmazdan men muny başarmazdym. Häzir men özüme buýsanýaryn” – diýip, Akudzawa aýtdy.
Täze synanyşyklar baradaky soraga ýaşuly “Indi hiç haçan” diýip, degişme bilen jogap berdi.
Kokiti Akudzawa Gumma prefekturasynyň alpinistler klubunyň hormatly başlygydyr. Ol daglara yzygiderli çykýar. 2022-nji ýylda alpinist Nabewariýama çykmak bilen öz 99 ýaşyny belledi.
Fudzi Honsýu adasyndaky işjeň wulkan we Ýaponiýanyň iň beýik dagydyr. Onuň beýikligi 3776 metre ýetýär.
