Ýakynda Gazagystanyň Aktau şäherinde Türki medeniýetiň halkara guramasy (TÜRKSOÝ) tarapyndan yglan edilen çagalaryň halkara döredijilik festiwaly geçirildi.
Çagalaryň döredijilik festiwalyna ýurdumyzdan hem ýaş zehinler gatnaşdylar. Olar festiwalyň çäklerinde ýekelikde aýdym aýtmak, saz çalmak, toparlaýyn tans etmek, surat çekmek boýunça geçirilen bäsleşiklerde baýrakly orunlara hem-de Hormat hatlardyr gymmat bahaly sowgatlara mynasyp boldular.
Netijede, ýekelikde saz çalmak boýunça Balkanabat şäherindäki 3-nji orta mekdebiň 7-nji synp okuwçysy Şamyrat Myratjanow baýrakly 1-nji orna, ýekelikde aýdym aýtmak boýunça Balkanabat şäherindäki tebigy ugurlara ýöriteleşdirilen 21-nji orta mekdebiň 7-nji synp okuwçysy Söýenç Maşadow 2-nji orna, halk aýdymlaryny ýerine ýetirmek boýunça Türkmenbaşy şäherindäki daşary ýurt dillerini çuňlaşdyryp öwredýän ýöriteleşdirilen 15-nji orta mekdebiň 8-nji synp okuwçysy Döwletgeldi Orazdurdyýew 3-nji orna, toparlaýyn tans etmek boýunça Balkanabat şäheriniň medeniýet merkeziniň «Abatjyk» çagalar tans topary 3-nji orna mynasyp boldular.
Festiwalyň «Türki dünýäsiniň milli oýunlary» atly surat çekmek boýunça bäsleşiginde çagalar öz ýurduna mahsus milli oýunlary şekillendirdiler. Bäsleşikde Wekilbazar etrabyndaky 7-nji orta mekdebiň 10-njy synp okuwçysy Bibinabat Aşyrowa 1-nji orna, Çärjew etrabyndaky 41-nji orta mekdebiň 11-nji synp okuwçysy Aýsel Semenderowa 2-nji orna, Gökdepe etrabyndaky 12-nji orta mekdebiň 11-nji synp okuwçysy Wepa Geldimämmedow 3-nji orna mynasyp boldular.
Aktau şäheri 2025-nji ýylda TÜRKSOÝ tarapyndan «Türki dünýäniň medeni paýtagty» diýlip yglan edilipdi.
